《「都係留喺屋企穩陣」》

  我以前話,依家啲小朋友唔再知道乜嘢係雞,因為佢哋無見過活雞,都無乜所謂嘅!小朋友見到嘅都係雞件,即係雞翼呀、雞髀呀、雞胸,或者係雞蛋咁囉!但係點樣都見唔到個雞頭喎?雞蛋同雞頭有冇關係呢?

 早兩日,見到新搬嚟同層個亞太同個女一齊搭𨋢、好緊張咁喝住個女唔好㩒𨋢,唔好望人,更加唔好同人打招呼...

 我哋依家教小朋友保護自己,就如某啲國家咁,只係可以露出一雙眼睛,穩陣起見,都係戴返個護眼面罩,有時真係見個小朋友焗到一頭汗咁!衞生署醫生提醒大家如果要見亞媽都要諗清楚,咁都要諗?

 依家做香港人,要獨居、獨食、兩夫妻要分開食飯瞓覺、得閒都唔好見亞媽、從幼稚園開始學習網上學習,唔返學無問題,一定可以升班,最緊要係交學費,都係留喺屋企穩陣啲...總之係為你好啦!