《孤獨。歌。星》

「釜山行」團友晚上分了兩個落腳點，民宿與酒店；後生仔梗係住民宿夠地道啦！可以感受吓當地居所之風，年長auntie、家庭與我之流住酒店就穩陣d。我哋呢幾晚嘅酒店就對正廣安大橋及長長沙灘，在地區鶴立雞群，極盡開揚景緻！

面對這大橋美景可以有好多節目，天未光，你可以坐在酒店不同樓層旁的梳化上看著日出，當然漫步沙灘是隨時的選擇啦！到了晚上，橋上會綻放色彩斑斕的燈飾，閃耀在海上；你可以在便利店買個煙花在夜空中畫出色彩，喚醒黑夜；每個晚上，到咗十、一二點便會響起夜半歌聲，你會聽到一個男生彈著結他唱著歌，背著大海正正就像向我們所住酒店住客唱歌，少也唱上了兩個小時，圍觀聽眾不多，只有零星的三五七個阿豬媽，唔知道這個男生在這裏唱了多久，至少在這三個晚上，總聽到他的歌聲！

「樂頌」十年，我間唔時也會覺得孤單，覺得我哋呢班人只係自稱為著耶穌揼石仔，每年信耶穌嘅人都好少，返教會嘅人亦都冇乜多到，好聽就話可以孤芳自賞，唔好聽其實自己真係無乜料到！釜山這幾個晚上，看到這個男生，一個人每晚唱著兩小時、三小時，就只是背著無人大海，面對著寂靜的街道，都係無人，每晚唱著、唱著，再唱著，結果，就只有這三五七個阿豬媽，唔知感覺會係點？

人多就興奮，人少就無㽼！呢個係其中一個感覺；當自己背著大海，聽到海浪聲，舉頭望天，看見繁星點點，街頭沒有人，獨個兒自彈自唱，係俾別人聽，還是自己樂在其中？我相信享受這個快樂，會帶給自己一份堅持，我也可以享受這孤獨。歌。星！