《「走進我的新世界」》

　今年學咗新嘢！Ruby 老婆教咗我，原來紅酒有新世界與舊世界之分；原來往常我哋多數都係飲一啲舊世界葡萄酒，重點係，正正因為Ruby 長知識時，我哋都在努力品嚐新世界的紅白酒啫！

　早兩日，同Ruby 帶咗初一出街食晏；初一食飽飯，揾嘢玩，開始將粒棉花糖搓圓撳扁，好似搓麵粉整湯圓咁，搓搓吓又搣少少㸃吓餐碟上的朱古力醬嚟食...後嚟索性雙手放在餐碟上與朱古力醬共舞，手掌玩完，輪到手背...小朋友的世界應該唔識乜嘢叫做不確定性與不安全感，就視乎大人提供俾小朋友的安全感多與少！

　前文提到茄雲協助個老友決定相信耶穌，此舉殊不簡單，就是帶領一個人從安全地帶走進新世界；你唔好以為「新」就一定係好，信耶穌應該都係好嘅！問題係嗰種不確定性，與不安全感，總是無時無刻，全天候四方八面的包圍住自己，守護者需要更大的力量，要有更持久堅持的信念！

　2021年，4月先至開始新一年，但係世界已經不再安全，我在這陌生新世界中只有一件事，就係勇往直前，並與各位看官共勉！