《「有正就是好」》

 今個禮拜司機好多job 嘢做!首先,係星期日零晨時候,由尖沙咀出發,第一站黃大仙、跟住去順利、再入將軍澳,最後返九龍灣屋企;回程時一出將軍澳隧道即刻風雷雨電,黃雨殺來,嚇死!其中小片段,有個老友特別客氣,唔該前唔該後,我每次都會報以一句「你俾面啫」,呢句都幾老土,但係真實!

 星期二,迎接最小的人,社會未來最大的棟樑,由大圍返黃大仙,要申請架!重要多番認證至得架!

 星期五,定期車外母去醫院檢查。

 任務完成,約咗個老友去馳名點心店嘆茶,席間老友再三自責今年停工幾個月,重未有新工作!我報以一個單字「正」!老友呢幾個月休息其間做咗煮飯公,每日負責做一家四口晚餐;以前就日忙夜忙,一個星期都未必會返屋企食一餐,依家就日日私房菜,晚晚都係團年飯!

 面對生活,有人會自己氹自己話「開心又係咁過,唔開心又係咁過,梗係揀開心啦」;我就相信,生活中事情必有它的好與壞,不過,做人又無需要太過極端,嘗試在惡劣中找到「正」的一鱗半爪,你就肯定可以經驗著生命總是美好的日子!