《「追趕暑假的豐富」》

 話說初一上個禮拜開始放暑假,眨吓眼,下個禮拜就開學啦!做正式幼稚園學生,搭車開始要俾錢啦!

 今日二姨婆約咗Ruby 同我,初一、弟弟Dani 同埋媽媽Yuki 去搭摩天輪,趕緊在短期暑假中搭上這盛夏摩天輪呢!尋日重係烈日高掛,今天一早就來個橫風橫雨,未停過落雨重點係,應承咗今日要去街!初一同Dani 知道有街去,不謀而合地抖擻精神唔瞓早午覺,等住去街;結果係Dani 坐巴士時無力再抗拒睡魔,車程不消10 分鐘已經瞓著咗,到達尖沙咀碼頭搭天星小輪去中環,Dani 到落船都未瞓醒!雨仍然是下過不停,卻無損我們目標為本的心情,首先坐一程摩天輪,跟住去玩旋轉木馬,攤位遊戲,釣魚掟波,影相打卡…一輪衝刺後,食個炮谷加熱狗下午茶,再玩多陣攤位遊戲,又坐第二次摩天輪,活動完滿結束!

 回程搭船返尖沙咀轉的士,船上的初一已經頂唔順瞓咗!上咗的士,未及5 分鐘,Dani 都瞓埋,兩姐弟一直瞓到第二朝!

 細路仔小朋友就有暑假,大人就無得放暑假啦!但係唔代表無正嘢!正嘢沒有年齡界限,如果你無正嘢,可能係因為你已經遺忘咗應有的天賦!趕快追番你暑假的豐富!